علــــــــبة إزاز!!

علبة ازاز محبوس فيها

شايف الناس من جدرانها

بيشاورو عليك

وينادوعليك تِطلَع بره

وانت يا مسكين بتقول لأة

بتقول مبسوط جوه العلبة

أصلَك معذور

من يوم ما وعيت

يا حزين ع الدُّنيا

وانت محبوس

جوه العلبة

شايف الناس بره بتضحك

أشباح ماشية

شفايف رايحة

شفايف جاية

وانت يا ولداه وحدك جوه

لا سامع صوتهم

لا حاسس خوفهم

أطرش يا عبيط وسط الزحمة

علبة ازاز جواها الدنيا

كام وردة اتقطفو في الزحمة

كام قلب اترسَمو ع الصَّفحة

وانت يا مسكين فرحان بيهم

فاكر اتزرعو عشانك وحدك

ولا اترسَمو ف حبك وحدك

                            

علبة ازاز ف ايدين سجَّانك

لما بيفضى يطل عليها

لما يمل هيلعب بيها

وانت يا مسكين فاكره حبيبك

شاغلاه عنك حاجه خطيرة

ومش بمزاجه سايبك وحدك

حلم حياته يفضل جنبك

وكرامة لحبك حياته

هيفنيها

علبه ازاز روحك فيها

كل حياتك هي عذابك

وايدين سجَّانك

تفضل ليلك تحلم بكرة

هييجي يزورك

هييجي بإيده يرمي الوردة

تفرح بيها

هييجي يقولك مش بمزاجي

غصب عني

خايف مرة اسيبك بره

لتضيع مني

وتلهيك الدُنيا وتلاهيها

وانت تصدَّق

قلبك يفرح

قلبه حنين

قلبه رهيف

خايف ع العلبة تروح منه

وانت يا مسكين

غافل بردو

علبة ازاز مسجون فيها

والورد بيدبل بالأيام

والرَّسم تروح منه الألوان

والسجَّان يزهق م العلبة

وينساك وحدك بالأيام

علبة ازاز حوافيها بتلمع

مدهونه دهب

معدنها صفيع

بمرور الوقت

صدا دهبها

واللي تملِي بيلعب بيها

مل ما فيها

راح بالأيام خوفه عليها

وبإهماله تقع من أيده

وانت يا مسكين قاعد جوه

كل مرة تقع العلبة

قلبك يقف

تتبرجل انت

وجدار العلبة يزيد كسرة

لحد ما يوم وقعت مرة

آخر مرة

اتكسرت منه

لستين حتة

ومشي وسابك وسط ازازك

مهو مش فاضي

يوطِّي يجيبك

وجري الناس بسرعه يشوفوا

انت كويس

وريني أيدك

طب ما تخافشِ

حاجه بسيطة

متعورتش

طب خير والله

بركة سليمة

ايوة كويس

قلبي استنو

كان ف العلبة

شكله اتكسَّر

مليون حتة

يلا بسيطَة

فرصه سعيدة

أول مرة اسمع صوتكو

أول مرة أشوف الزيطه

أول مرة أشوف إيه بره

أول مرة اسيب العلبة

اتاري الورد جنانيه كتيرة

والقلب مهوش رسمه عبيطه

ده نبض وحب

حاجه كبيرة

والسما واسعة

ساعات دافيه

وساعات بردو

رياحها شديدة

آل وانا عشت حياتي ف علبة

جدرانها ازاز

حوافيها بتلمع

مدهونه دهب

معدنها نحاس

بس استنو

أنا كنت سجين

فين سجَّاني

ردوا وقالو

تلاقيه مشغول

أو راح يلحق

قبل الزحمه

يشتري علبه

علبة ازاز

بس جديــــــــــــدة~

N.M